BREAKING NEWS

WAKUU WA MIKOA, WILAYA NA WAKURUGENZI SIMAMIENI UWAJIBIKAJI-MAJALIWA.


 WAZIRI  Mkuu Kassim Majaliwa, akizungumza na watumishi wa Halmashauri ya Mji wa Geita,  kwenye ukumbi wa Halmashauri hiyo jana Novemba 27, 2018.  Kulia ni Mbunge wa Chato na Waziri wa Nishati Dk. Medard Kalemani na kushoto ni Mkuu wa Mkoa wa Geita,  Mhandisi Robert Gabriel. (Picha na Ofisi ya Waziri Mkuu


Na Mwandishi Wetu, Geita

WAKUU wa Mikoa, Wilaya na Wakurugenzi wa Halmashauri zote nchini, wameagizwa kusimamia vizuri uwajibikaji na utowaji wa huduma kwa wananchi katika maeneo yao bila ya woga. 
Kadhalika, kila mtumishi wa umma nchini ametakiwa awajibike katika kufanya kazi kwa bidii na kwamba Serikali ya Awamu ya Tano haitowavumilia watumishi ambao ni wezi, wabadhilifu, wavivu  na haitosita kuwachukulia hatua.
Kauli hiyo imetolewa na Waziri Mkuu Kassim Majaliwa, jana jioni Novemba 27, 2018, alipozungumza na watumishi, viongozi wa mkoa, wilaya ya Geita na taasisi za umma katika mkutano uliofanyika kwenye ukumbi wa Mamlaka ya Mji Geita.

“Watumishi fanyeni kazi kwa bidii na msitarajie kuundiwa tume pale mnapofanya vibaya, ukiharibu kazi tunakushughulikia hapo hapo na huu ndio msimamo wa Serikali ya Awamu ya Tano inayoongozwa na Rais Dk. John Magufuli,”alisema.



 BAADHI ya watumishi wa Halmashauri ya Mji wa Geita wakimsikiliza Waziri Mkuu Kassim Majaliwa, (hayupo pichani),  wakati alipozungumza nao kwenye ukumbi wa halmashauri hiyo jana.


Waziri Mkuu aliwaeleza watumishi hao kuwa wanatakiwa wafanye kazi kwa kuzingatia sheria na kanuni za kazi na pia watambue dhamana kubwa waliyonayo, ambayo ni kuwahudumia wananchi wote bila ya ubaguzi wa aina yoyote.

Katika hatua nyingine, Waziri Mkuu aliwaagiza watumishi wa umma hususani Wakuu wa Idara wahakikishe wanakuwa na kitabu cha Ilani ya Uchanguzi ya Chama Cha Mapinduzi (CCM) ili wapate muelekeo wa utekelezaji washughuli zao.

Waziri Mkuu alisema kitabu cha Ilani ya uchanguzi cha CCM 2015/2020 kina maelekezo ya utekelezaji wa miradi mbalimbali ambayo kila idara inatakiwa kuangalia maelekezo yaliyotolewa kuhusu idara husika na kuyafanyia kazi.

                 VIONGOZI na wananchi wakimsikiliza Majaliwa, (hayupo pichani).

Kwa upande wake Mkuu wa Mkoa wa Geita, Mhandisi Robert Gabriel alimuhakikishia Waziri Mkuu kwamba yeye kwa kushirikiana na viongozi wenzake watayafanyia kazi maelekezo yote ambayo ameyatoa.

No comments