Breaking News

ENDELEENI KUTENGA MAENEO YA MAPUMZIKO-MAJALIWA.



 WAZIRI Mkuu, Kassim Majaliwa,  akikagua ujenzi wa maegesho ya malori makubwa  katika eneo la Nala Jijini Dodoma, wakati alipotembelea mradi wa uendelezaji  wa Miji ya Kimkakati katika Jiji la Dodoma, leo Desemba 29, 2018. Watatu kushoto ni Naibu Waziri, Ofisi ya Waziri Mkuu, Kazi, Vijana na Ajira, Anthony Mavunde na  wapili kushoto ni Mkurugenzi wa jiji hilo Godwin Kunambi. (Picha zote na Ofisi ya Waziri Mkuu).


                 Na Mwandishi Wetu, Dodoma

WAZIRI MKUU Kassim Majaliwa, ametembelea mradi wa Uendelezaji  wa Miji ya Kimkakati katika Jiji la Dodoma na kukagua ujenzi wa maegesho ya malori makubwa  katika eneo la Nala na uboreshwaji wa mandhari ya eneo la kupumzikia la Chinangali jijini humo.

Katika ziara hiyo, Waziri Mkuu alimuagiza Mkurugenzi wa Jiji la Dodoma, Godwin Kunambi, andelee kutenga maeneo ya mapumziko ili wananchi wapate sehemu za kukutana na kubadilishana mawazo baada ya kumaliza kufanya kazi.

Waziri Mkuu alikagua maeneo hayo leo Desemba 29, 2018 ambapo ameupongeza uongozi wa jiji hilo kwa kubuni wazo hilo na kusema kwamba ni muhimu kwa miji mikubwa kutenga maeneo ya kwa ajili ya mapumziko.

Alisema lazima Dodoma lipangwe kisasa  na aliwataka wahandisi wahakikishe maeneo ya mapumziko yanatengwa na yanatumika kama ilivyokusudiwa na kumtaka Kunambi, aendelee kusimamia ujenzi wa kimkakati ndani ya jiji hilo.

”Hatuwezi kuwa tumejaza nyumba kila eneo, watu hawana mahali pa kupumzika na kukutana na marafiki zao plan ya Chinangali Park ni nzuri, Jiji la Dar es Salaam plan ya awali kulikuwa na maeneo ya mapumziko, lakini watu wa Idara ya Ardhi waliyauza,” alisema Majaliwa.

Katika hatua nyingine,Waziri Mkuu alikagua utekelezaji wa agizo alilolitoa Oktoba 21, 2018  kwa uongozi wa Jiji la Dodoma la kubomoa uzio wa mabati uliojengwa kwenye eneo la wazi lililotengwa  kwa ajili ya kuchezea watoto na kuziba barabara ya tisa  katika Mtaa wa Mji Mpya Kata ya Madukani jijini humo.  

Waziri Mkuu alisema ameridhishwa na utekelezwaji wa agizo lake baada ya kutembelea eneo hilo na kukuta uzio umebomolewa na sasa kuna bustani iliyojengwa kwa ajili ya mapumziko na pia barabara imefunguliwa na wananchi wanaendelea kuitumia kama ilivyokuwa awali.


WAZIRI Mkuu, Kassim Majaliwa,  akiendelea kukagua ujenzi wa magari hayo.

Uzio huo ambao mbali na kujengwa katika eneo la wazi lililotengwa kwa ajili ya kuchezea watoto kwenye mtaa wa Mji Mpya kata ya Madukani pia uliziblibarabara ya tisa, hivyo kusababisha usumbufu mkubwa kwa watumiaji wa barabara hiyo.

Waziri Mkuu aliendelea kusisistiza uongozi wa jiji hilo kutenga ardhi na kupima viwanja kwa ajili ya matumizi mbalimbali yakiwemo ya biashara, makazi, taasisi, huduma za jamii, viwanda pamoja na maeneo ya wazi kwa ajili ya mapumziko.

Kwa upande wake, Kunambi, alisema Dodoma ni miongoni mwa majiji manane nchini yanayotekeleza mradi wa uboreshaji wa miji ya kimkakati unaofadhiliwa na Serikali kupitia mkopo wa Benki ya Dunia.

Alisema katika Jiji la Dodoma mradi huo unahusisha ujenzi wa miundombinu ya barabara katika maeneo ya Kikuyu, Chidachi, Kinyambwa, Itega, Njedengwa, Mapinduzi, Ilazo, Ipagala, Chamwino, Kilimani, Majengo, Mlezi pamoja na maingilio na stendi kuu ya mabasi na soko kuu zenye jumla ya urefu wa kilomita 26.6.

Kwa mujibu wa Kunambi, ema barabara hizo zinajengwa kwa kiwango cha lami, pia zitawekwa taa za barabarani takriban 925 zinazotumia mfumo wa umeme wa jua.

Hata hivyo, alisema mradi huo utahusisha ujenzi wa kituo cha maegezo ya malori makubwa takribani 300 katika eneo la Nala.

Aliongeza kuwa mradi huo unahusisha ujenzi wa kituo kikuu cha mabasi na soko kuu katika eneo la Nzuguni, ujenzi wa vituo sita vya watembea kwa miguu, ujenzi wa vizimba saba vya kukusanyia taka ngumu, uboreshaji wa mandhali ya eneo la kupumzikia katika eneo la Chinangali na ujenzi wa mtaro wa maji ya mvua wenye urefu wakilomita 6.5 katika eneo la Ipagala.

No comments