Breaking News

MAJALIWA AUTAKA UONGOZI WA TAASISI YA KARUME KUBUNI MBINU, KUTAFUTA MIRADI MINGINE YA UJENZI.

 WAZIRI Mkuu Kassim Majaliwa, akizungumza na mwanafunzi wa mwaka wa tatu wa Kitengo cha Kompyuta Safaa Haroub, baada ya kuweka jiwe la msingi wa jengo jipya la Taasisi ya Karume ya Sayansi na Teknolojia iliyopo Mbweni Wilayani Magharibi ‘B’  Unguja jana Januari 8, 2019.

                      Na Mwandishi Wetu, Zanzibar

WAZIRI Muu, Kassim Majaliwa,  amefungua jengo la Taasisi ya Karume ya Sayansi na Teknolojia (KIST), wilaya ya Magharibi ‘B’ lililojengwa kwa ghararama ya sh. Bilioni 4.2.

Alifungua jengo hilo jana Januari 8, 2019 ikiwa ni sehemu ya maadhimisho ya sherehe za miaka 55 ya Mapinduzi Matukufu ya Zanzibar yaliyotokea Januari 12, 1964.

Waziri Mkuu alisema kukamilika kwa Jengo la taasisi hiyo kuna manufaa makubwa kwa jamii ikiwemo kutoa elimu ya ufundi itakayowasaidia vijana kujiajiri na kuondokana na utegemezi.

“Kusaidia azma ya Serikali ya kufikia uchumi wa kati ifikapo 2025 na msukumo katika sekta ya viwanda kwa vijana kujiajiri na kuajiriwa katika sehemu mbalimbali pamoja na Serikalini,” alisema.

Alisema manufaa mengine ya KIST ni kutoa mafunzo ya fani mbalimbali zinazokwenda sambamba na mabadiliko ya ulimwengu katika nyanja za sayansi, teknolojia na ualimu.

Kadhalika, Waziri Mkuu aliutaka uongozi wa KIST kubuni mbinu mbalimbali na utafute miradi mingine ya ujenzi itakayosaidia kuwa na miundombinu ya kisasa ya kutolea elimu.


WAZIRI  Mkuu Kassim Majaliwa,  akikata utepe kufungua jengo jipya la Taasisi ya Karume ya Sayansi na Teknolojia. (Picha zote na Ofisi ya Waziri Mkuu).

Alisema uongozi wa taasisi hiyo hauna budi kuweka mikakati ya kushirikiana na taasisi nyingine zinazotoa mafunzo ya ufundi ndani na nje ya nchi ili kubadilishana uzoefu.

Kwa mujibu wa Waziri Mkuu Majaliwa, kulingana na maendeleo ya kiteknolojia na mahitaji ya soko uongozi wa KIST ujipange kutoa mafunzi ya biomedical Engineering na kuimarisha mafunzo ya matengenezo ya ndege na urubani katika ngazi ya stashahada.

Awali, Waziri wa Elimu na Mafunzi ya Amali, Riziki Pembe Juma, alisema wizara yake itaendeleza taasisi hiyo ili kuwaendeleza vijana na baadae waweze kujiajiri na kuajiri.

Alisema vijana wanaohitimu mafunzo ya fani mbalimbali katika taasisi hiyo wanapewa mikopo ya masharti nafuu na Serikali baada ya kujiunga kwenye vikundi.

Waziri huyo, alisema wahitimu hao kabla ya kupewa mikopo wanaandika andiko la miradi ambayo watakwenda kuitekeleza ambapo tayari vikundi zaidi ya 10 vya vijana vimeshawezeshwa.

No comments