BREAKING NEWS

MAVUNDE AWATAKA KAZI SACCOS KUWA NA MIRADI YENYE TIJA.


NAIBU Waziri, Ofisi ya Waziri Mkuu (Kazi, Vijana na Ajira) Anthony Mavunde (wa nne kutoka kushoto) akiwa katika picha ya pamoja na wajumbe waliohudhuria Mkutano Mkuu Wanachama wa Kazi SACCOS Januari 19, 2019.Jijini Dodoma.
                                  Na Mwandishi Wetu, Dodoma

NAIBU Waziri Ofisi ya Waziri Mkuu (Kazi, Ajira na Vijana) Anthony Mavunde, ameutaka uongozi wa Kazi SACCOS kubuni miradi yenye tija ili kuboresha mfuko wao na kuleta manufaa kwa wanachama wake.
Alitoa rai hiyo jana Januari 19, 2019 wakati akifungua Mkutano Mkuu wa kwanza wa wanachama wa SACCOS hiyo uliofanyika jana Januari 19, 2019 katika ukumbi wa mikutano wa ofisi za TAKWIMU Jijini Dodoma.
 
Alisema, uongozi wa chama hicho hauna budi kubuni miradi ya kimkakati inayotekelezeka na kuendana na mazingira, na hali ya kiuchumi ya eneo husika.
“Ni vyema uongozi kuangalia fursa za kiuchumi zilizopo Dodoma ili kuanzisha miradi itakayoendana na hali halisi ya kiuchumi pamoja na kukikwamua chama chenu kuendelea kuwa na tija,” alisisitiza Mavunde.
Lengo la mkutano hilo lilikuwa ni kupeana taarifa za uendeshaji wa chama, kufanya uchaguzi wa viongozi wapya katika bodi ya uongozi na kamati ya usimamizi pamoja na kujadili namna bora ya kuendelea kuboresha chama hicho ili kuendelea kuwa na tija kwa wanachama wake.
Aidha, aliwatoa hofu wanachama kwa kueleza kuwa, uwepo wa vyama hivi ni kisheria na kikanuni za utumishi wa umma na kuwataka kuviheshimu ili kuendelea kuwa wanachama hai.
“Ieleweke kuwa ukiwa katika chama hiki, bado upo katika utaratibu na kanuni za utumishi wako hivyo muendelee kufanya vyema katika chama ili kujipatia heshima ndani na nje ya ofisi yako,” alisema Mavunde. 
Aliwapongeza viongozi pamoja na wanachama wote kwa mchango wanaoutoa kwa ofisi yake kuzingatia mchango wa chama kwa watumishi wote.
“Ninashawishika na kuona mchango wenu kwetu kama ofisi, kwani mmechangia kutatua changamoto zinazowakabili watumishi wetu, ambao vinginevyo wangeshindwa kutoa huduma bora yenye tija kwa wadau wetu kutokana na changamoto za kifedha huwenda ingechangia kuwaingiza katika matendo ya utovu wa nidhamu kama vile rushwa,”alisisitiza.
Pia, aliwataka viongozi wa ofisi yake kuendelea kuunga mkono jitihada hizo ambazo chama kimezionesha hususani uanzishwaji wa miradi ikiwemo ikiwemo kuwekeza katika viwanda. 
Kwa upande wake Mwenyekiti wa Chama hicho, Omari Sama aliunga mkono maagizo hayo kwa kuanzisha miradi endelevu itakayoleta maendeleo ya kiuchumi kwenye chama, kuongeza wanachama na kukifanya chama hiko kitambulike zaidi.
Naye Mkurugenzi wa Utawala na Rasilimali Watu wa ofisi hiyo, Peter Kalonga, aliuasa uongozi mpya kuendelea kutoa elimu ya ushirika kwa wanachama ili kuweza kutatua changamoto wanazokabiliana nazo.

MSAJILI wa Vyama vya Wafanyakazi, Ofisi ya Waziri Mkuu (Kazi, Vijana, Ajira na Wenye Ulemavu) Dorothy Uwiso, akichangia jambo wakati wa ufunguzi wa mkutano huo. Kulia ni Mvunde.



BAADHI ya wajumbe wa mkutano huo wakipiga makofi wakati wa kumkaribisha mgeni rasmi Mavunde(hayupo pichani)..

NAIBU Waziri, Ofisi ya Waziri Mkuu (Kazi, Vijana na Ajira) Anthony Mavunde, (kushoto) akifuatilia taarifa ya utekelezaji ya Bodi ya Uongozi wa Kazi SACCOS LTD wakati wa mkutano huo.

MKURUGENZI  wa Utawala na Rasilimali Watu Ofisi ya Waziri Mkuu Kazi, Vijana, Ajira na Wenye Ulemavu  Peter Kalonga, akiwasilisha salamu za Katibu Mkuu wa ofisi hiyo ambaye ni Mlezi wa Chama hicho wakati wa mkutano huo.



BAADHI ya Wanachama wa Kazi SACCOS Ltd wakimsikiliza Naibu Waziri Ofisi ya Waziri Mkuu (Kazi, Vijana na Ajira) Mhe. Anthony Mavunde (hayupo pichani).


OFISA Kazi Wilaya ya Kinondoni Yusuf Nzugile, akichangia mada wakati wa mkutano huo.

No comments