BREAKING NEWS

SERIKALI IMEJIPANGA KUMALIZA TATIZO LA MAJI NCHINI-MAJALIWA.



WAZIRI   Mkuu, Kassim Majaliwa,  akiweka jiwe la msingi la ujenzi wa Hospitali ya wilaya ya Geita  ya Nzera,jana  Novemba 27, 2018. Wapili kulia ni Waziri wa Nishati, Dk. Medard Kalemani na kulia ni Naibu Waziri, Ofisiya Rais TAMISEMI, Mwita Waitara .  Watatu kulia ni Mbunge wa Geita Vijijini, Joseph Msukuma  na  wapili kushoto ni Mkuu wa Mkoa wa Geita, Mhandisi Robert Gabriel. (Picha zote na Ofisi ya Waziri Mkuu)


Na Mwandishi Wetu, Geita

WAZIRI MKuu Kassim Majaliwa, amesema Serikali imepanga kumaliza tatizo la upatikanaji wa huduma ya maji safi na salama kwa kuchimba visima virefu na vifupi pamoja na kutumia maji ya maziwa na mito na kuyapeleka katika maeneo mbalimbali ya wananchi nchini. 
Pia, Waziri Mkuu aliwaagiza wakuu wa wilaya kusimamia uhifadhi wa maeneo ambayo yana vyanzo vya maji ili kuyafanya yaendelee kuwa chepechepe, hivyo kuhakikisha vijiji vyote vinapata maji ya uhakika. “Lazima maeneo hayo yatambuliwe na yahifadhiwe.”
Aliyasema hayo jana Novemba 27, 2018,  alipozungumza na wananchi kwenye mkutano wa hadhara uliofanyika katika uwanja wa shule ya Sekondari Bugando, kata ya Nzera wilayani Geita, wakati akiwa katika ziara yake ya kikazi za ya siku nne mkoani Geita.

MAJALIWA, akiwasalimia wanawake waliojifungua katika Hospitali ya Wilaya  ya Geita ya Nzera baada ya kuweka jiwe la msingi la ujenzi wa hospitali hiyo.

Majaliwa alisema, Serikali kupitia kampeni ya Rais Dk. John Magufuli, ya kumtua mama ndoo kichwani, itahakikisha wananchi katika maeneo yote nchini wanapata huduma ya maji safi na salama karibu na maeneo yao ya makazi.

Alisema serikali imejipanga vizuri kuhakikisha kila kijiji kinapata huduma ya maji safi na salama, hivyo amewaagizawatendaji wote wa vijiji kuainisha maeneo yote yenye misitu na vyanzo vya maji na kuhakikisha yanalindwa.

Kadhalika, Waziri Mkuu alisema mbali na huduma ya maji, pia serikali imedhamiria kusambaza umeme katika vijiji vyote ambavyo bado havijaunganishiwa nishati hiyo nchini vitaunganishiwa katika awamu ya tatu ya Mradi wa Nishati Vijijini (REA).

Waziri Mkuu akijadiliana jambo na Mbunge wa Geita Vijijini, Jioseph Msukuma  wakati alipotembelea Wodi ya Wazazi katika Hospitali ya Wilaya ya Geita,
 
“Rais wetu Dk. John Magufuli anataka kuona nyumba ya kila Mtanzania inapata umeme tena kwa gharama nafuu na ametenga fedha nyingi zitakazotosheleza kusambaza umeme katika vijiji vyote nchini. Gharama za kuunganishiwa umeme huo ni sh. 27,000 tu,” aliffanua Majaliwa.

Hata hivyo, Waziri Mkuu alisema  wananchi hawatawajibika tena katika kulipia gharama za nguzo wala fomu za maombi ya kuunganishiwa umeme kwa sababu tayari gharama hizo zimeshabebwa na serikali.

Naye, Mbunge wa jimbo la Geita Vijijini, Joseph Musukuma, aliishukuru serikali kwa utekelezaji wa miradi na ahadi zikiwemo na zile zilizotolewa za Rais Dk. John Magufuli. “Nashukuru serikali pia kwa kutuzindulia hospitali ya halmashauri ya wilaya ya Geita,” alisema Msukuma.


WAZIRI Mkuu, Kassim Majaliwa akihutubia mkutano wa hadhara katika kijiji cha Nzera wilayani Geita.

Kuhusu suala la umeme, Msukuma alishukuru serikali kwa kuwa vijiji vyake vyote vimeshaunganishiwa umeme isipokuwa vitongoji vichache, ambapo aliomba navyo viunganishiwe nishati hiyo muhimu kwa maendeleo ya wananchi.

Awali, Waziri Mkuu alikagua na kuzindua hospitali ya wilaya ya Geita inayojengwa katika kata ya Nzera na aliupongeza uogozi wa halmashauri ya wilaya ya Geita kwa hatua waliyofikia katika utekelezaji wa miradi mbalimbali ya maendeleo.

No comments