BREAKING NEWS

WAZIRI MKUU KASSIM MAJALIWA AZINDUA MSIKITI. *AWAASA WAUMINI WAKE WAUTUMIE KWA KUFANYA IBADA NA KUHAMASISHA AMANI.



WAZIRIi Mkuu Kassim Majaliwa, akizungumza wakati alipozindua Msikiti wa Nandagala wilayani Ruangwa,  jana Novemba 19, 2018.  (Picha zote na Ofisi ya Waziri Mkuu).


Na Mwandishi Maalumu, Lindi

WAUMINI wa dini ya Kiislamu katika Kata ya Nandagala wilayani Ruangwa, wameaswa kuutumia vizuri msikiti huo kwa kufanya ibada na kuhamasisha amani na si vinginevyo.

“Msikiti huu ninauzindua leo (jana) naomba tuutunze vizuri na tuutumie kwa kufanya ibada na si ibada za kiuanaharakati. Watakaokuja msikitini na kufanya mambo ya hovyo, Mwenyezi Mungu atawalaani,” alisema Waziri Mkuu Majaliwa.

Waziri Mkuu Kassim Majaliwa, alitoa rai hiyo baada ya kuzindua msikiti wa Nandagala jana Novemba 19, 2018, ambapo alitumia fursa hiyo kuwasisitiza waumini wa dini ya Kiislamu kuhakikisha muda wa kufanya swala unapofika waende msikitini hapo kufanya ibada.


MAJALIWA akisisitiza jambo wakati akizungumza na waumini hao baada ya kuzindua msikiti huo

Kadhalika, aliwataka waumini hao waanzishe madrasa na kuwafundisha watoto quran lengo likiwa ni kuwafundisha misingi ya dini na kuwaandaa vizuri na kuwawezesha kukua kiimani ili waje kuwa waja wema.

Hata hivyo, Waziri Mkuu alimshukuru muumini wa dini hiyo, Mzee Suleiman na familia yake kwa uamuzi wao wa kujitolea kujenga msikiti huo ambao utawawezesha waumini wa Kijiji cha Nandagala, kufanya ibada zao.

 “Namshukuru na Mzee Mamboleo na mkewe kwa kutoa eneo lao bure ili litumike kujengea msikiti,” alisema Kassim Majaliwa.



WAZIRI Mkuu Kassim Majaliwa, (kushoto), akishiriki katika dua  iliyoongozwa na Sheikh Hilal  Shaweji, maarufu Sheikh Kipozeo  (watatu kulia), wakati alipozindua Msikiti wa Nandagala, wilayani Ruangwa. Wapili kulia ni  Mzee Suleyum Mohammed Ahmed, ambaye alifadhili kujenga msikiti huo  pamoja na familia yake.


Kwa upande wake Sheikh Hilal Kipozeo, ambaye alihudhuria uzinduzi wa msikiti huo, aliwakumbusha na kuwasisitiza waumini wa dini ya Kiislam watumie muda mwingi kwa ajili ya kufanya ibada na wajiepushe na vitendo vyenye kumuasi Mwenyezi Mungu na wadumishe amani.

“Mtume Muhammad (S.A.W) baada ya kutoka katika mji wa Makka na kuhamia Madina kitu cha kwanza alijenga msikiti ili watu waweze kumwabudu Mwenyezi Mungu, alijenga soko ili watu washiriki shughuli za kiuchumi na alifanya upatanishi kwa makabila mawili kwa lengo la kuonesha kuwa kuishi kwa amani ni kitu bora.”


WAZIRI Mkuu, Kassim Majaliwa, akiwapungia wananchi baada ya kuzindua Msikiti wa Nandagala, wilayani Ruangwa.

Katika uzinduzi huo, wananchi na waumini wa dini ya Kiislamu katika Kijiji cha Nandagala walimshukuru mfadhili aliyejenga msikiti huo kwa sababu utawawezesha kuwa na eneo la kufanyia ibada baada ya lile la awali kubomolewa kwa kuwa walijenga katika hifadhi ya barabara.

No comments